केम-पाथूर्डी रस्त्याच्या निकृष्ट कामाविरोधात उपसरपंच सागर कुरडे आक्रमक; बांधकाम विभागाला निवेदन सादर
केम-पाथूर्डी रस्त्याच्या निकृष्ट कामाविरोधात उपसरपंच सागर कुरडे आक्रमक; बांधकाम विभागाला निवेदन सादर
करमाळा तालुक्यातील केम ते पाथूर्डी या रस्त्याचे काम अत्यंत निकृष्ट दर्जाचे झाल्याने नागरिकांमध्ये तीव्र नाराजी पसरली आहे. या निकृष्ट कामाची तक्रार करत केमचे उपसरपंच सागर कुरडे यांनी करमाळा बांधकाम विभागाला लेखी निवेदन सादर केले आहे. रस्त्याचे काम त्वरित दुरुस्त करण्याची मागणी त्यांनी या निवेदनाद्वारे केली आहे.
गेल्या काही दिवसांपासून केम ते पाथूर्डी रस्त्याचे नूतनीकरण सुरू होते. मात्र, काम सुरू झाल्यापासूनच या कामाच्या गुणवत्तेबाबत प्रश्नचिन्ह उपस्थित केले जात होते. रस्त्याच्या कामात वापरण्यात आलेले साहित्य निकृष्ट दर्जाचे असून, कामाची गुणवत्ताही अत्यंत खराब असल्याचे स्थानिकांचे म्हणणे आहे. अनेक ठिकाणी रस्त्यावर खड्डे पडले असून, त्यामुळे वाहनचालकांना आणि पादचाऱ्यांना मोठा त्रास सहन करावा लागत आहे.
उपसरपंच सागर कुरडे यांनी सांगितले की, "स्थानिक नागरिकांकडून या रस्त्याच्या निकृष्ट कामाबद्दल मोठ्या प्रमाणावर तक्रारी येत होत्या. नागरिकांच्या हितासाठी आणि त्यांना चांगल्या रस्त्याची सुविधा मिळावी यासाठी मी स्वतः बांधकाम विभागाला निवेदन दिले आहे. जर यावर तात्काळ कार्यवाही झाली नाही, तर तीव्र आंदोलन छेडण्यात येईल."
करमाळा बांधकाम विभागाने या निवेदनाची गंभीर दखल घेऊन, संबंधित कंत्राटदारावर कारवाई करावी आणि रस्त्याचे काम तातडीने दुरुस्त करावे, अशी मागणी उपसरपंच कुरडे यांनी केली आहे. या रस्त्यामुळे परिसरातील अनेक गावांना फायदा होतो. त्यामुळे हा रस्ता चांगल्या दर्जाचा असणे अत्यंत आवश्यक आहे. नागरिकांनीही या मागणीला पाठिंबा दर्शवला असून, बांधकाम विभाग यावर काय भूमिका घेतो, याकडे सर्वांचे लक्ष लागले आहे
.
