केम जिल्हा परिषद गट: भाजपच्या निष्ठवान कार्यकर्त्यांना संधी द्या; सुरेखा संतोष देवकर यांच्या उमेदवारीची मागणी
केम जिल्हा परिषद गट: भाजपच्या निष्ठवान कार्यकर्त्यांना संधी द्या; सुरेखा संतोष देवकर यांच्या उमेदवारीची मागणी
केम (प्रतिनिधी): आगामी जिल्हा परिषद निवडणुकीच्या पार्श्वभूमीवर राजकीय वातावरण तापू लागले असून, केम जिल्हा परिषद गटातून भारतीय जनता पक्षाच्या निष्ठवान कार्यकर्त्याला उमेदवारी मिळावी, अशी मागणी जोर धरत आहे. या शर्यतीत भाजपच्या जुन्या आणि निष्ठावंत कार्यकर्त्या सौ. सुरेखा संतोष देवकर यांचे नाव आघाडीवर असून, त्यांना उमेदवारी मिळावी अशी भावना कार्यकर्त्यांकडून व्यक्त होत आहे.
गेल्या अनेक वर्षांपासून भारतीय जनता पक्षाचे विचार तळागाळातील लोकांपर्यंत पोहोचवण्यासाठी देवकर परिवाराने मोठे योगदान दिले आहे. पक्षाच्या कठीण काळातही डगमगून न जाता, संघटना बांधणीसाठी त्यांनी सातत्याने प्रयत्न केले आहेत. त्यामुळे "पक्षाने बाहेरच्या उमेदवारांऐवजी रक्ताच्या आणि निष्ठवान कार्यकर्त्याचा विचार करावा," असे मत स्थानिक भाजप समर्थकांनी व्यक्त केले आहे.
सुरेखा संतोष देवकर यांचा केम गटात दांडगा जनसंपर्क असून, महिलांच्या समस्या सोडवण्यासाठी त्यांनी नेहमीच पुढाकार घेतला आहे. संतोष देवकर यांनीही भाजपच्या माध्यमातून विविध सामाजिक उपक्रम राबवून युवकांचे संघटन केले आहे. या दांडग्या जनसंपर्काचा फायदा पक्षाला आगामी निवडणुकीत निश्चितपणे होऊ शकतो, असा दावा त्यांच्या समर्थकांनी केला आहे.
पक्षाच्या वरिष्ठ नेत्यांनी केम गटातील स्थानिक परिस्थितीचा आढावा घेऊन, ज्यांनी पक्षासाठी घाम गाळला आहे अशाच चेहऱ्याला संधी द्यावी. सुरेखा देवकर यांच्यासारख्या सुशिक्षित आणि अनुभवी महिला उमेदवाराला संधी मिळाल्यास हा गट भाजप मोठ्या मताधिक्याने जिंकेल, असा विश्वास केम परिसरातील कार्यकर्त्यांनी व्यक्त केला आहे.
