अवैध वाळू व्यवसायिकावर करमाळा पोलिसांची जोरदार कारवाई: ४ लाख ९० हजार रुपये किमतीची १९ ब्रास वाळू जप्त: तिघा इसमावर गुन्हे दाखल
अवैध वाळू व्यवसायिकावर करमाळा पोलिसांची जोरदार कारवाई: ४ लाख ९० हजार रुपये किमतीची १९ ब्रास वाळू जप्त: तिघा इसमावर गुन्हे दाखल
करमाळा पोलीस ठाणे हद्दीत अवैध वाळू उपसा व वाहतुक करणाऱ्या विरुद्ध करमाळा पोलिसांनी कारवाई केली आहे .त्यांच्या कडून ४ लाख ९० हजार रुपये किमतीची १९ ब्रास वाळू जप्त करण्यात आली असून तिघा इसमावर गुन्हे दाखल करण्यात आले आहेत.
ही कारवाई १६ मे रोजी करण्यात आली आहे.
सुहास उर्फ सिध्दु भारत तावसे, राजेश महेंद्र रोकडे व आनंद सुखदेव सातव, सर्व रा. वांगी नं. ३, ता. करमाळा या संशयित आरोपी विरुध्द गुन्हा दाखल करण्यात आला आहे. सदर कारवाईमध्ये अंदाजे १ लाख ८० हजार रुपये किंमतीचा १८ ब्रास वाळुचा ढिगारा, अंदाजे ३ लाख १० हजार रु. किंमतीचा टाटा ४०७ टेम्पो (क्र. एम. एच. १०/ के. -८२१८) व त्यात अंदाजे १ ब्रास वाळु असा एकुण ४ लाख ९० हजार रुपये किंमतीचा मुद्देमाल जप्त करण्यात आला आहे.
उपविभागीय पोलीस अधिकारी अजित पाटील , वरिष्ठ पोलिस निरीक्षक रणजीत माने, पो.ना. प्रमोद गवळी, मनिष पवार, वैभव टेंगल, सोमनाथ जगताप, अर्जुन गोसावी, रविराज गटकुळ, ज्ञानेश्वर घोंगडे, विलास आलदर, राहुल माने आदिच्या ही या पथकाने ही कामगिरी बजावली आहे .
याबाबत अधिक माहिती अशी की, वरिष्ठ पोलीस निरीक्षक रणजीत माने यांना मिळालेल्या माहितीनुसार तालुक्यातील मौजे वांगी नं. ३ येथे चोरुन वाळु वाहतुक सुरु असल्याने उपविभागीय पोलीस अधीकारी अजित पाटील यांच्या मार्गदर्शनानुसार वरिष्ठ पोलीस निरीक्षक रणजीत माने यांनी एक पोलीस पथक तयार करून संबंधित अवैध वाळू वाहतूक करणाऱ्याला पकडण्यासाठी सापळा रचला.
मिळालेल्या माहितीनुसार मौजे वांगी नं. ३, येथील उजनी जलाशयाच्या नदीपात्राकडे छापा टाकण्यासाठी जात असताना संशयित अवैध व्यवसायिकांना पोलिस आल्याची चाहूल लागली. पोलिसांना पाहताच सुहास उर्फ सिध्दु भारत तावसे व राजेश महेंद्र रोकडे हे वाळूने भरलेला टेम्पो घेवुन तेथुन पळुन गेले. त्याचा पाठलाग करीत उजनी जलाशयाकडे जात असताना समोरुन टाटा कंपनीचा टेम्पो क्र. एम. एच. १०/ के.- ८२१८ हा दिसल्याने त्यास पोलीसांनी त्यांची गाडी आडवी लावून तपासणी केली असता त्या टेम्पोचा चालक आनंद सुखदेव सातव, रा. वांगी नं. ३, ता. करमाळा हाही टेम्पो जागीच सोडुन तेथुन पळुन गेला. सदर टेम्पोमध्ये १ ब्रास वाळु मिळुन आली.
यावेळी नदीकाठी पाहणी केली असता उजनी जलाशयाच्या कडेला वाळुचा उपसा करुन ढिगारा घातल्याचे दिसुन आले. त्याबाबत वाळूचा पंचनामा करुन करमाळा पोलीस ठाणे येथे पोलिसांनी तिघांच्या विरोधात भारतीय न्याय संहिता कलम ३०३ (२), ३(५), सह पर्यावरण संरक्षण अधिनियम कलम ९ व १५ प्रमाणे गुन्हा दाखल केला.
